கனடா நாட்டின் வரலாற்றிலேயே மிகப்பெரிய தங்கக் கொள்ளைச் சம்பவமாகப் பார்க்கப்படும் டொராண்டோ பியர்சன் சர்வதேச விமான நிலைய கொள்ளை வழக்கில் முக்கியமான ஒரு திருப்பம் ஏற்பட்டுள்ளது.
2023 ஆம் ஆண்டு ஏப்ரல் மாதம் 17 ஆம் திகதி, சுவிட்சர்லாந்தின் சூரிச்சில் இருந்து ஏர் கனடா விமானம் மூலம் டொராண்டோவுக்கு கொண்டு வரப்பட்ட 400 கிலோ எடையுள்ள தங்கக் கட்டிகளும், சுமார் 2.5 மில்லியன் அமெரிக்க டொலர் மதிப்புள்ள வெளிநாட்டு பணத்தாள்களும் கொள்ளையடிக்கப்பட்டன.
அந்த நேரத்தில் சுமார் 20 மில்லியன் டொலர்களுக்கு மேல் மதிப்பிடப்பட்டிருந்த 6,600 தங்கக் கட்டிகள், விமான நிலைய சரக்கு கிடங்கில் வைக்கப்பட்டிருந்த வேளையில், சரியான ஆவணங்களுடன் வந்த மோசடியாளர்களால் எடுத்துச் செல்லப்பட்டன. உண்மையான பெறுநர்கள் பார்சல்களை கேட்டுப் போகும் வரை இந்த மோசடி கண்டுபிடிக்கப்படாமல் இருந்தது.
இந்தச் சம்பவம் தொடர்பாக 9 பேர் மீது குற்றச்சாட்டுகள் பதிவு செய்யப்பட்ட நிலையில், அவர்களில் ஒருவரான ஜார்ஜ்டவுனைச் சேர்ந்த அம்மாத் சௌத்ரி, 2024 ஆம் ஆண்டு கைது செய்யப்பட்டார். அவர் மீது 5,000 டொலர்களுக்கு மேற்பட்ட திருட்டு மற்றும் குற்றச் செயலுக்கு உடந்தையாக இருந்தது உள்ளிட்ட குற்றச்சாட்டுகள் பதிவு செய்யப்பட்டிருந்தன.
இந்நிலையில், சௌத்ரி மீதான அனைத்து குற்றச்சாட்டுகளும் 2026 ஆம் ஆண்டு ஏப்ரல் மாதம் 9 ஆம் திகதி அரசு வழக்குரைஞர்களால் விலக்கிக் கொள்ளப்பட்டுள்ளன. இது அவர் கைது செய்யப்பட்டு சரியாக இரண்டு ஆண்டுகள் ஆன நாளாகும்.
இந்த முடிவு குறித்து அவரது வழக்கறிஞர் ரவின் பிள்ளை எந்தவொரு காரணத்தையும் வெளிப்படையாகத் தெரிவிக்கவில்லை. எனினும், 2024-ம் ஆண்டு கைது செய்யப்பட்டதில் இருந்து தனது வாடிக்கையாளர் மீது இனி எந்தக் குற்றச்சாட்டுகளும் இல்லை என்பதை அவர் உறுதிப்படுத்தியுள்ளார்.
இந்தக் கொள்ளைச் சம்பவத்தில் 89,000 டொலர்கள் மதிப்புள்ள ஆறு வளையல்கள் மட்டுமே மீட்கப்பட்டுள்ள நிலையில், மீதமுள்ள தங்கம் எங்கே, எப்படி மறைக்கப்பட்டது அல்லது விற்கப்பட்டது என்பது இன்னும் மர்மமாகவே உள்ளது. அது உருக்கப்பட்டு வேறு வடிவில் விற்கப்பட்டிருக்கலாம் என அதிகாரிகள் சந்தேகிக்கின்றனர்.
இந்த வழக்கின் முக்கியக் குற்றவாளிகளில் ஒருவரான அர்சலான் சௌத்ரி, 2026 ஏப்ரல் மாதம் நான்கு ஆண்டுகள் சிறைத்தண்டனை விதிக்கப்பட்டு தண்டனை அனுபவித்து வருகிறார்.
மேலும், இந்த விசாரணையின் ஒரு பகுதியாக “ப்ராஜெக்ட் 24K” என்று பெயரிடப்பட்ட நடவடிக்கையில் 10 பேருக்கு எதிராக 19 குற்றச்சாட்டுகள் பதிவு செய்யப்பட்டுள்ளன. இந்திய வம்சாவளியைச் சேர்ந்த மேலும் சில சந்தேக நபர்கள் தொடர்பிலும் விசாரணைகள் நடைபெற்று வருகின்றன.
