ஆப்கானிஸ்தான் கிரிக்கெட் அணி இந்தியாவில் சுற்றுப்பயணம் செய்து ஒரு டெஸ்ட் போட்டி மற்றும் மூன்று ஒருநாள் போட்டிகள் கொண்ட தொடரில் விளையாடுகிறது. ஜூன் 6-ம் தேதி தொடங்கும் ஒரேயொரு டெஸ்ட் போட்டி சண்டிகரில் நடைபெறுகிறது.
இதனைத் தொடர்ந்து மூன்று ஒருநாள் போட்டிகள் நடைபெறவுள்ளன. இருப்பினும், ஒருநாள் போட்டிக்கான இந்திய அணியில் இடம்பெற்றிருந்த சூப்பர் ஸ்டார் விராட் கோலி, காயம் காரணமாகத் தொடரில் இருந்து விலகியுள்ளார்.
விராட் கோலி சமீபத்தில் நிறைவடைந்த ஐ.பி.எல். 2026 இறுதிப்போட்டியின் போது தொடை தசை காயத்திற்கு (hamstring injury) உள்ளானார். ஐ.பி.எல். இறுதிப் போட்டியில் ராயல் சேலஞ்சர்ஸ் பெங்களூரு அணிக்குத் தலைமை தாங்கி வெற்றி பெற்ற அவர், இந்தக் காயத்தின் போதும் விளையாடியுள்ளார்.
பின்னர் நடத்தப்பட்ட ஸ்கேனில், ‘டிஸ்டல் செமிமெம்ப்ரனோசஸ் டெண்டன் டியர்’ (distal semimembranosus tendon tear) எனப்படும் அரிதான தொடை தசைக் காயம் கண்டறியப்பட்டுள்ளதாக பி.சி.சி.ஐ. வட்டாரங்கள் தெரிவித்தன.
“ஒருநாள் தொடரில் இருந்து விலகுவது மிகவும் வருத்தமாக இருக்கிறது. ஐ.பி.எல். இறுதிப் போட்டியில் காயம் ஏற்பட்டாலும், அணிக்காக விளையாடினேன். மருத்துவ ஆலோசனையின் பேரில் இந்த முடிவை எடுக்க வேண்டியிருந்தது. மீண்டும் குணமடைந்து களம் காண்பேன்,” என்று கோலி தெரிவித்துள்ளார்.
37 வயதாகும் கோலி, தனது சிறப்பான உடல் தகுதிக்கு பெயர் போனவர். இதற்கு முன் அரிதாகவே காயம் காரணமாக போட்டிகளை நழுவ விட்டுள்ளார். கோலியின் இந்த திடீர் விலகல், ஆப்கானிஸ்தானுக்கு எதிரான தொடருக்கான எதிர்பார்ப்புகளை குறைத்துள்ளது. கோலியின் ஆட்டத்தை எதிர்பார்த்திருந்த ரசிகர்கள் பெரும் ஏமாற்றத்திற்குள்ளாகியுள்ளனர்.
கோலிக்கு பதிலாக சென்னை சூப்பர் கிங்ஸ் அணியின் தலைவர் ருதுராஜ் கைக்வாட் ஒருநாள் அணியில் இணைக்கப்படுவார் என எதிர்பார்க்கப்படுகிறது. கைக்வாட் தற்போது இலங்கையில் நடைபெறும் ‘இந்தியா ஏ’ அணியின் முக்கோண தொடரில் விளையாடி வருகிறார். இதேபோல், ரோகித் ஷர்மாவின் உடல் தகுதி இன்னும் உறுதிப்படுத்தப்படவில்லை.
ஐ.பி.எல். போட்டிகளிலும் அவர் காயத்தினால் பாதிக்கப்பட்டிருந்தார். இருப்பினும், தற்காலிக ஒருநாள் அணியில் இவரும் இடம்பெற்றுள்ளார். கோலி மற்றும் ரோகித் ஷர்மா இருவரும் கடந்த ஆண்டு டெஸ்ட் கிரிக்கெட்டில் இருந்து ஓய்வு பெற்றனர். 2027 ஒருநாள் உலகக் கோப்பைக்கான தயாரிப்பில் ஒருநாள் அணியில் அவர்களின் பங்கு முக்கியமானதாகும்.
இந்தியா – ஆப்கானிஸ்தான் தொடரின் அட்டவணை
ஜூன் 6 முதல் ஜூன் 10 வரை ஒரேயொரு டெஸ்ட் போட்டி நியூ சண்டிகரில் நடைபெறுகிறது.
மூன்று ஒருநாள் போட்டிகள்
முதல் ஒருநாள் போட்டி ஜூன் 13-ம் தேதி தர்மசாலாவிலும், இரண்டாவது ஒருநாள் போட்டி ஜூன் 17-ம் தேதி லக்னோவிலும், மூன்றாவது மற்றும் இறுதி ஒருநாள் போட்டி ஜூன் 20-ம் தேதி சென்னையில் உள்ள எம்.ஏ. சிதம்பரம் அரங்கிலும் நடைபெறும்.
டெஸ்ட் போட்டி அணி விவரம்
சுப்மன் கில் (தலைவர்), யஷஸ்வி ஜெய்ஸ்வால், கே.எல். ராகுல் (துணைத் தலைவர்), சாய் சுதர்சன், ரிஷப் பண்ட் (விக்கெட் கீப்பர்), துருவ் ஜுரேல் (விக்கெட் கீப்பர்), தேவ்தத் படிக்கல், நிதிஷ் குமார் ரெட்டி, வாஷிங்டன் சுந்தர், குல்தீப் யாதவ், முகமது சிராஜ், பிரசித் கிருஷ்ணா, மனவ் சுதர், கர்னூர் பிரார் மற்றும் ஹர்ஷ் துபே.
ஒருநாள் போட்டி அணி விவரம்
சுப்மன் கில் (தலைவர்), ரோகித் சர்மா (உடற்தகுதிக்கு உட்பட்டு), விராட் கோலி (காயம் காரணமாக வெளியேறினார்), ஸ்ரேயாஸ் ஐயர் (துணைத் தலைவர்), கே.எல். ராகுல் (விக்கெட் கீப்பர்), இஷான் கிஷன் (விக்கெட் கீப்பர்), ஹர்திக் பாண்டியா (உடற்தகுதிக்கு உட்பட்டு), நிதிஷ் குமார் ரெட்டி, வாஷிங்டன் சுந்தர், குல்தீப் யாதவ், அர்ஷ்தீப் சிங், பிரசித் கிருஷ்ணா, பிரன்ஸ் யாதவ், கர்னூர் பிரார் மற்றும் ஹர்ஷ் துபே.
