தமிழக அரசியலில் பெரும் திருப்பமாகக் கருதப்படும் 2026 சட்டமன்றத் தேர்தல் முடிவுகள் வெளியாகி, அனைவரையும் ஆச்சரியத்தில் ஆழ்த்தியுள்ளன. விஜய் தலைமையிலான தமிழக வெற்றிக் கழகம் (தவெக), முதல் முறையாக போட்டியிட்ட தேர்தலிலேயே கணிசமான வெற்றியைப் பதிவு செய்து அரசியலில் புதிய வரலாறு படைத்துள்ளது.
முன்னதாக வெளியான கருத்துக் கணிப்புகள் திமுக மீண்டும் ஆட்சியைத் தொடரும் என சுட்டிக்காட்டியிருந்தன. ஆனால் தேர்தல் முடிவுகள் வெளியாகும் போது நிலைமை முற்றிலும் மாறி, தவெக 100-க்கும் மேற்பட்ட தொகுதிகளில் முன்னிலை பெற்றது. இறுதியில், 118 இடங்கள் தேவைப்படும் நிலையில், 108 தொகுதிகளில் வெற்றி பெற்று ஆட்சிக்குத் தகுதியான நிலையை உருவாக்கியுள்ளது.
தபால் வாக்குகள் எண்ணிக்கையின் தொடக்கத்தில் திமுக முன்னிலை வகித்தாலும், பின்னர் நிலைமைகள் வேகமாக மாறி தவெக முன்னிலை பெறத் தொடங்கியது. ஒரு கட்டத்தில், தவெக திமுகவை முந்தி முதன்மை இடத்தைப் பிடித்தது. தொடர்ந்து, அதிமுக மற்றும் திமுக இரண்டாம், மூன்றாம் இடங்களுக்கு இடையில் மாறி மாறி வந்தன.
75 ஆண்டுகளுக்கு மேற்பட்ட அரசியல் பாரம்பரியம் கொண்ட திமுகவும், 50 ஆண்டுகளைக் கடந்த அதிமுகவும் பின்னுக்குத் தள்ளப்பட்டுள்ளன. மூன்று ஆண்டுகள் மட்டுமே ஆன தவெக, இவ்வளவு பெரிய அரசியல் சக்திகளுக்கு போட்டியாக உருவெடுத்திருப்பது முக்கியமான மாற்றமாகக் கருதப்படுகிறது.
முன்னர் 1977ஆம் ஆண்டு எம்.ஜி.ஆர். தலைமையில் அதிமுக முதல் தேர்தலில் வெற்றி பெற்றது குறிப்பிடத்தக்கது. அதேபோல், 2006இல் விஜயகாந்த் தொடங்கிய கட்சி ஆரம்பத்தில் குறைந்த வெற்றியை மட்டுமே பெற்றது. ஆனால், விஜயின் தவெக முதல் முறையிலேயே 1.7 கோடி வாக்குகளுக்கு மேல் பெற்று, சுமார் 35% வாக்கு விகிதத்தை எட்டியுள்ளது.
இந்த வெற்றி, “அடுத்த எம்.ஜி.ஆர் யார்?” அல்லது “அடுத்த விஜயகாந்த் யார்?” என்ற கேள்விகளுக்கு முற்றுப்புள்ளி வைத்து, “நான் தான் முதல் விஜய்” என்ற பதிலை உறுதிப்படுத்தும் வகையில் அமைந்துள்ளது.
குறிப்பாக, அரசியல் அனுபவமோ, பெரிய பின்னணியோ இல்லாத தவெக வேட்பாளர்கள், அமைச்சர்கள் உட்பட பல பெரிய தலைவர்களை வீழ்த்தி வெற்றி பெற்றிருப்பது கவனிக்கத்தக்கது. மேலும், விஜய் மற்ற கட்சித் தலைவர்களைப் போல அதிக அளவில் பிரச்சாரம் செய்யாத போதிலும், அவரது தனிப்பட்ட கவர்ச்சி மற்றும் மக்கள் ஆதரவு மிகப்பெரிய தாக்கத்தை ஏற்படுத்தியுள்ளது.
இதுவரை தமிழக அரசியலில் நிலவி வந்த பாரம்பரிய அரசியல் முறைமைகளை முறியடித்து, மாற்றத்தை விரும்பிய மக்களின் விருப்பம் இந்த தேர்தலில் வெளிப்பட்டுள்ளது. நடிகர்கள் அரசியலில் வெற்றி பெற முடியாது என்ற விமர்சனங்களையும் உடைத்து, சுமார் 50 ஆண்டுகளுக்கு பிறகு திரைத்துறையிலிருந்து வந்தவர் மீண்டும் ஆட்சிக்குத் திரும்பியிருக்கிறார்.
வெற்றியை அடையாளமாக வைத்து கட்சி தொடங்கிய விஜய், தனது முதல் தேர்தலிலேயே அந்த இலக்கை அடைந்து, தமிழக அரசியலில் புதிய பாதையை உருவாக்கியுள்ளார்.
