“New Year, New You” என்ற வாசகங்கள் புத்தாண்டு நெருங்கும் போது எங்கும் கேட்கத் தொடங்கிவிடும். ஜிம், டயட் விளம்பரங்கள் சமூக வலைதளங்களில் நிரம்பி வழியும். அலுவலகம் திரும்பும் உரையாடல்களிலும், ஜனவரியில் யார் என்ன மாற்றம் செய்யப் போகிறார்கள் என்பதே முக்கிய பேசுபொருளாக இருக்கும்.
ஆனால் உண்மை என்னவென்றால், பெரும்பாலான புத்தாண்டு தீர்மானங்கள் ஜனவரி மாதத்தின் நடுப்பகுதிக்குள் கைவிடப்பட்டு விடுகின்றன. இருப்பினும், இந்த ஆண்டு வேறுபடலாம். உங்கள் தீர்மானங்களை எடுத்து, அதை தொடர வைக்கும் சில நிபுணர் ஆலோசனைகளை இங்கே பார்க்கலாம்.
1. நடைமுறைக்கு ஏற்ற இலக்குகளை உருவாக்குங்கள்
“எடை குறைக்க வேண்டும்”, “வேலையை மாற்ற வேண்டும்”, “வீடு மாற வேண்டும்” போன்ற தீர்மானங்கள் கேட்பதற்கு நல்லதாக இருந்தாலும், அவை தெளிவான செயல் திட்டங்கள் அல்ல. இவை தேவையற்ற அழுத்தத்தை மட்டுமே உருவாக்கும் என முன்னாள் மருத்துவரும் நம்பிக்கை பயிற்சியாளருமான டாக்டர் கிளேர் கே கூறுகிறார்.
உங்கள் வாழ்க்கையில் தற்போது எது நன்றாக நடக்கிறது, எது உங்களை சோர்வடையச் செய்கிறது, எங்கு நீங்கள் பழக்கவழக்கப்படி இயங்கிக் கொண்டிருக்கிறீர்கள் என்பதை முதலில் புரிந்துகொள்ள வேண்டும்.
“எடையை குறைக்க வேண்டும்” என்பதற்கு பதிலாக, “எனக்கு சுறுசுறுப்பாகவும் உடலுக்கு வசதியாகவும் உணர என்ன உதவுகிறது என்பதை அறிய விரும்புகிறேன்” என்று இலக்கை மாற்றிக் கொள்ளலாம்.
அதேபோல் “வேலையை மாற்ற வேண்டும்” என்பதற்கு, “எனக்கு அர்த்தமும் உற்சாகமும் தரும் வேலை எது என்பதை கண்டறிந்து, அதற்கான ஒரு சிறிய படியை எடுக்க விரும்புகிறேன்” என்று எழுதலாம்.
2. இந்த இரண்டு வார்த்தைகளை தவிருங்கள்
உங்கள் தீர்மானங்களில் “எப்போதும் (always)” மற்றும் “எப்போதும் இல்லை (never)” போன்ற வார்த்தைகளை பயன்படுத்த வேண்டாம் என்று உளவியலாளர் கிம்பர்லி வில்சன் அறிவுறுத்துகிறார்.
“நான் எப்போதும் புதன்கிழமை ஓடுவேன்” அல்லது “நான் இனி ஒருபோதும் மது அருந்த மாட்டேன்” போன்ற உறுதிமொழிகள், ஒரு நாள் தவறினாலே அனைத்தையும் கைவிடச் செய்யும் மனநிலையை உருவாக்கிவிடும்.
ஒரு நாள் தவறு நடந்துவிட்டால், முழுத் திட்டமும் வீணாகிவிட்டதாக நினைப்பது தவறு. ஒவ்வொரு நாளையும் தனித்தனி முயற்சியாக பார்க்க வேண்டும்.
“நான் முயற்சி செய்து பார்க்க விரும்புகிறேன்”, “இதற்காக மேலும் இடம் உருவாக்க விரும்புகிறேன்”, “எனக்கு என்ன வேலை செய்கிறது என்பதை கற்றுக்கொண்டு வருகிறேன்” போன்ற நெகிழ்வான மொழியை பயன்படுத்தலாம்.
3. தடுமாற்றம் ஏற்படும் என்பதை ஏற்றுக்கொள்ளுங்கள்
சில வாரங்கள் சிறப்பாக நடந்த பிறகு, ஒரு நாள் உடற்பயிற்சி தவறினால் அல்லது டேக் அவே சாப்பிட்டால், பலர் மனம் தளர்ந்து விடுகிறார்கள்.
பெரும்பாலானோர் தங்களின் “சிறந்த வடிவத்திற்கே” திட்டமிடுகிறார்கள். சோர்வான நாள், வேலை அழுத்தம் போன்ற சூழ்நிலைகளுக்கான திட்டம் இருப்பதில்லை.
தடுமாற்றம் என்பது தோல்வி அல்ல. முழுமையை விட தொடர்ச்சியே முக்கியம். ஒரு நாள் தவறு நடந்தால், அதைப் பற்றி குற்றம் சாட்டாமல், ஏன் அப்படி நடந்தது என்று ஆராய்ந்து, அடுத்த நாளையே புதிய தொடக்கமாக எடுத்துக்கொள்ள வேண்டும்.
4. பழக்கங்களை இணைத்துப் பழகுங்கள்
“Habit stacking” எனப்படும் முறையில், புதிய பழக்கத்தை ஏற்கனவே உள்ள தினசரி பழக்கத்துடன் இணைக்கலாம்.
உதாரணமாக, பல் துலக்கிய பிறகு 10 புஷ்அப், குழந்தைகளை படுக்க வைத்த பிறகு சிறிய ஸ்ட்ரெட்ச், அல்லது மது ஊற்றிய பிறகு 10 நிமிடம் எழுதுவது போன்றவை.
இதனால் புதிய பழக்கம் தனி சுமையாக தெரியாது. மேலும், வாசிப்பை அதிகரிக்க வேண்டும் என்றால், புத்தகத்தை தலையணையின் மேல் வைத்தால், தூங்கும் முன் அதைத் தவிர்க்க முடியாது.
5. நேர்மறையாக மாற்றுங்கள்
சேமிப்பு அல்லது செலவு கட்டுப்பாடு போன்ற தீர்மானங்கள், ஒரு மகிழ்ச்சியான இலக்குடன் இணைந்தால் அவை நீடிக்கும். விடுமுறை பயணம் அல்லது அவசர நிதி போன்ற தெளிவான நோக்கம் இருந்தால், சேமிப்பு ஒரு கட்டுப்பாடாக இல்லாமல் அர்த்தமுள்ள முயற்சியாக மாறும்.
அதிகமாக அனைத்தையும் ஒரே நேரத்தில் மாற்ற முயற்சிக்க வேண்டாம். மாதத்திற்கு £100 சேமிப்பது சிரமமாக தோன்றினால், £20 கூட போதுமான முன்னேற்றமே. பழக்கத்தை உயிரோடு வைத்திருப்பதே முக்கியமானது.
