சுவிட்சர்லாந்தின் கிரான்ஸ்-மொண்டானா ஸ்கை ரிசார்ட்டில் உள்ள ஒரு பாரில் புத்தாண்டு நள்ளிரவில் ஏற்பட்ட பயங்கரமான தீ விபத்தில் 40 பேர் உயிரிழந்துள்ளனர்; 119 பேர் காயமடைந்துள்ளனர். வாலைஸ் மாகாண அதிகாரிகள், இந்த தீ விபத்துக்கு காரணம் சாம்பேன் பாட்டில்களில் வைக்கப்பட்ட ஸ்பார்க்ளர்கள் (sparklers) என தெரிவித்துள்ளனர்.
வாலைஸ் அதிகாரப்பூர்வ பொது வழக்கறிஞர் பெட்ரீஸ் பில்லூட் ஒரு செய்தியாளர் சந்திப்பில், “தீ ஸ்பார்க்ளர்களிலிருந்து தொடங்கியது. அவை சாம்பேன் பாட்டில்களில் வைக்கப்பட்டு, அந்த பாட்டில்கள் கூரைக்கு மிக அருகில் நகர்த்தப்பட்டிருந்தன. அதன் மூலம் தீ மிக வேகமாகப் பரவியது” என்று கூறினார்.
தற்போது நடந்துவரும் விசாரணை, பாரின் தீப்பாதுகாப்பு நடவடிக்கைகள், அதிகபட்ச கொள்ளளவு, தீ ஏற்பட்ட நேரத்தில் உள்ளிருந்த நபர்களின் எண்ணிக்கை மற்றும் பயன்படுத்தப்பட்ட பொருட்கள் ஆகியவற்றை கவனமாக ஆராய்ந்து வருகிறது. குற்றச்சாட்டுகள் தேவைப்படும் பட்சத்தில், உயிருடன் இருக்கும் பொறுப்பாளிகள் மீது வழக்கு தொடரப்படும் என்றும் அவர் தெளிவுபடுத்தினார்.
பாரின் உரிமையாளர்களில் ஒருவர், கடந்த 10 ஆண்டுகளில் மூன்று முறை ஆய்வுகள் நடத்தப்பட்டு, அனைத்து விதிமுறைகளும் பின்பற்றப்பட்டதாக உள்ளூர் ஊடகங்களிடம் தெரிவித்துள்ளார்.
தற்போது, பலியான 40 பேரை முறையாக அடையாளம் காணும் பணி முதன்மையான கவனமாக உள்ளது என காவல் துணை ஆணையர் பிரெடெரிக் கிஸ்லர் தெரிவித்தார். காயமடைந்த 119 பேரில் 113 பேர் அடையாளம் காணப்பட்டுள்ளனர் – இவர்களில் 71 சுவிஸ் குடிமக்கள், 14 பிரெஞ்சு, 11 இத்தாலியர்கள் மற்றும் 4 செர்பியர்கள் உள்பட பல நாட்டினர் உள்ளனர். ஆறு பேரின் அடையாளம் இன்னும் தீர்மானிக்கப்படவில்லை.
வாலைஸ் மாகாண தலைவர் மாத்தியாஸ் ரெய்னார்ட், காயமடைந்தவர்களில் சுமார் 50 பேர் ஐரோப்பா முழுவதும் உள்ள சிறப்பு காய மீட்பு மையங்களுக்கு மாற்றப்பட்டுள்ளனர் அல்லது விரைவில் மாற்றப்பட உள்ளனர் என்றார். இவர்களில் 19 வயதான பிரெஞ்சு கால்பந்து வீரர் தாஹிரிஸ் டோஸ் சாண்டோஸ் உள்பட பலர் கடுமையாக தீக்காயமடைந்துள்ளனர். டோஸ் சாண்டோஸ் ஜெர்மனிக்கு மருத்துவ உதவியுடன் அனுப்பப்பட்டுள்ளார்.
பல குடும்பங்கள் இன்னும் தங்கள் காணாமல் போன உறவினர்களைப் பற்றிய தகவல்களை ஆவலுடன் எதிர்பார்த்து வருகின்றனர். இதில், 16 வயதான இத்தாலிய இளைஞன் அச்சில்லே பாரோசி உள்பட பலர் காணாமல் போயுள்ளனர். புத்தாண்டு நள்ளிரவு 1:30 மணியளவில் தனது ஜாக்கெட் மற்றும் தொலைபேசியை எடுக்க பாருக்குள் நுழைந்த பிறகு அவரை யாரும் பார்க்கவில்லை. அவரது அத்தை பிரான்செஸ்கா, “அவன் இன்னும் உயிருடன் இருக்கிறானா என்றே எங்களுக்குத் தெரியவில்லை” என்று பிபிசிக்கு தெரிவித்தார்.
பலியானவர்களை அடையாளம் காண, “டிஸாஸ்டர் விக்டிம் ஐடென்டிபிகேஷன்” (DVI) என்ற சிறப்பு முறை பயன்படுத்தப்படுகிறது. இதில் மருத்துவர்கள், பற்பதிவியல் நிபுணர்கள், தடய அறிவியல் வல்லுநர்கள் மற்றும் விசாரணை அதிகாரிகள் இணைந்து பணியாற்றுகின்றனர்.
