15 வயதிலேயே கிரிக்கெட் உலகை அதிரவைத்த இளம் வீரர் Vaibhav Suryavanshi மீண்டும் ஒரு உலக சாதனையை பதிவு செய்து அனைவரையும் ஆச்சரியத்தில் ஆழ்த்தியுள்ளார். ஐபிஎல் தொடரில் ராஜஸ்தான் ராயல்ஸ் அணிக்காக விளையாடும் இவர், தனது அதிரடி பேட்டிங்கால் முன்னணி பந்துவீச்சாளர்களையே கலங்கடித்து வருகிறார்.
சமீபத்தில் T20 கிரிக்கெட்டில் மிகக் குறைந்த பந்துகளில் 100 சிக்ஸர்கள் அடித்த வீரர் என்ற புதிய சாதனையை வைபவ் படைத்துள்ளார். 20 வயதுக்குட்பட்டோரில் இதுவரை யாரும் எட்டாத இந்த சாதனையை இவர் நிகழ்த்தியுள்ளார்.
இதன் மூலம் வெஸ்ட் இண்டீஸ் ஜாம்பவான் Kieron Pollard வைத்திருந்த நீண்டகால சாதனையை வைபவ் முறியடித்துள்ளார். பொல்லார்ட் 843 பந்துகளில் 100 சிக்ஸர்கள் அடித்திருந்த நிலையில், வைபவ் வெறும் 514 பந்துகளில் இந்த மைல்கல்லை எட்டியுள்ளார்.
குஜராத் டைட்டன்ஸ் அணிக்கு எதிரான போட்டியிலும் வைபவ் தனது அதிரடியை வெளிப்படுத்தினார். அந்த ஆட்டத்தில் வெறும் 16 பந்துகளில் 36 ரன்கள் குவித்த அவர், 3 சிக்ஸர்கள் மற்றும் 3 பவுண்டரிகள் அடித்து ரசிகர்களை கவர்ந்தார். முகமது சிராஜ் வீசிய முதல் பந்தையே சிக்ஸருக்கு பறக்கவிட்டு தனது தாக்கத்தை ஆரம்பித்தார்.
மேலும், ஒரே ஐபிஎல் இன்னிங்ஸில் அதிக சிக்ஸர்கள் அடித்த வீரர் என்ற சாதனையும் வைபவ் வசமே உள்ளது. சன்ரைசர்ஸ் ஹைதராபாத் அணிக்கு எதிரான போட்டியில் 12 சிக்ஸர்கள் அடித்து அசத்திய அவர், அதே ஆட்டத்தில் வெறும் 37 பந்துகளில் 103 ரன்கள் குவித்திருந்தார்.
இளம் வயதிலேயே இத்தகைய சாதனைகளை தொடர்ந்து பதிவு செய்து வரும் வைபவ் சூர்யவன்ஷி, எதிர்கால இந்திய கிரிக்கெட்டின் முக்கிய நட்சத்திரமாக உருவெடுத்து வருகிறார்.
