இந்திய கிரிக்கெட் அணியின் முன்னணி வேகப்பந்துவீச்சாளரான ஜஸ்ப்ரீத் பும்ரா, கிட்டத்தட்ட மூன்று ஆண்டுகளுக்குப் பிறகு மீண்டும் ஒருநாள் கிரிக்கெட் அணியில் இடம்பிடித்துள்ளார். கடைசியாக 2023-ஆம் ஆண்டு நடைபெற்ற ஒருநாள் உலகக் கோப்பை தொடரில் இந்திய அணிக்காக விளையாடியிருந்த அவர், தற்போது இங்கிலாந்து அணிக்கு எதிரான மூன்று போட்டிகள் கொண்ட ஒருநாள் தொடருக்கான இந்திய அணியில் சேர்க்கப்பட்டுள்ளார்.
அடுத்த மாதம் ஜூலை 14-ஆம் தேதி தொடங்கும் இந்த தொடருக்கான இந்திய அணி ஜூன் 21-ஆம் தேதி அறிவிக்கப்பட்டது. அதில் பும்ராவின் பெயர் இடம்பெற்றிருப்பது ரசிகர்களிடையே மிகுந்த உற்சாகத்தையும் எதிர்பார்ப்பையும் ஏற்படுத்தியுள்ளது.
2023 உலகக் கோப்பை இறுதிப்போட்டிக்குப் பிறகு பும்ரா ஒருநாள் கிரிக்கெட்டில் விளையாடவில்லை. இந்த காலகட்டத்தில் முக்கியமான டெஸ்ட் தொடர்கள் மற்றும் 2024, 2026 டி20 உலகக் கோப்பை போட்டிகளுக்கான தயாரிப்புகள் காரணமாக அவரது பணிச்சுமையை கருத்தில் கொண்டு இந்திய அணி நிர்வாகம் அவரை ஒருநாள் போட்டிகளில் இருந்து ஓய்வில் வைத்திருந்தது.
இந்த மூன்று ஆண்டுகால இடைவெளியில் இந்திய அணி விளையாடிய மொத்தம் 26 ஒருநாள் போட்டிகளில் பும்ரா பங்கேற்கவில்லை என தகவல்கள் தெரிவிக்கின்றன. மேலும் தென்னாப்பிரிக்கா, ஆஸ்திரேலியா, நியூசிலாந்து, இலங்கை, இங்கிலாந்து மற்றும் ஆப்கானிஸ்தான் அணிகளுக்கு எதிரான ஒருநாள் தொடர்களையும் அவர் தவறவிட்டார். அதேபோல் சாம்பியன்ஸ் டிராபி தொடரிலும் அவர் இடம்பெறவில்லை.
இந்நிலையில், 2027 ஒருநாள் உலகக் கோப்பையை இலக்காகக் கொண்டு இந்திய அணி தனது முக்கிய வீரர்களை தயார்படுத்தி வரும் நிலையில், பும்ராவின் மீள்வரவு அணிக்கு பெரிய பலமாக பார்க்கப்படுகிறது. அவரது அனுபவமும் பந்துவீச்சுத் திறமையும் இந்திய அணியின் வெற்றி வாய்ப்புகளை மேலும் அதிகரிக்கும் என எதிர்பார்க்கப்படுகிறது.
