மத்திய தரைக்கடல் பகுதியில் பாதுகாப்பு நிலைமை மோசமடைந்து வரும் நிலையில், சைப்பிரஸில் உள்ள தனது இராணுவத் தளங்களைப் பாதுகாக்க இங்கிலாந்து அரசு நவீன போர்க்கப்பலை நிலைநிறுத்த தீர்மானித்துள்ளது.
அதன்படி, United Kingdom தனது ‘HMS Dragon’ என்ற Type 45 வகை அழிப்புக் கப்பலை Cyprus நோக்கி அனுப்புகிறது. உலகின் முன்னணி வான் பாதுகாப்பு போர்க்கப்பல்களில் ஒன்றாகக் கருதப்படும் இந்தக் கப்பல், குறுகிய நேரத்தில் பல ஏவுகணைகளை ஏவக்கூடிய திறன் கொண்டது. 10 வினாடிகளுக்குள் 8 ஏவுகணைகளை ஏவ முடியும் என தெரிவிக்கப்படுகிறது. கப்பலில் 200-க்கும் மேற்பட்ட கடற்படை வீரர்கள் பணியில் ஈடுபடுகின்றனர்.
மேலும், கப்பலுடன் இரண்டு ‘Wildcat’ ஹெலிகாப்டர்களும் அனுப்பப்படுகின்றன. இவை ‘Martlet’ வகை ஏவுகணைகளால் ஆயுதம்செய்யப்பட்டுள்ளன. குறிப்பாக ட்ரோன் தாக்குதல்களை தடுக்க இந்த ஹெலிகாப்டர்கள் பயன்படுத்தப்படவுள்ளன.
RAF Akrotiri விமானத் தளத்தின் மீது கடந்த ஞாயிற்றுக்கிழமை நடத்தப்பட்ட ட்ரோன் தாக்குதலுக்கு பிந்தைய முன்னெச்சரிக்கை நடவடிக்கையாக இந்த பாதுகாப்பு பலப்படுத்தல் மேற்கொள்ளப்பட்டுள்ளது.
இந்நிலையில் கீர் ஸ்டார்மர், ஈரான் மற்றும் அதன் ஆதரவு அமைப்புகள் மேற்கொள்ளும் ஆபத்தான தாக்குதல்களுக்கு எதிராக இங்கிலாந்து தனது நட்பு நாடுகளுடன் உறுதியாக நிற்கும் என தெரிவித்துள்ளார். “இங்கிலாந்து மற்றும் அதன் கூட்டணி நாடுகளின் நலன்களைப் பாதுகாக்க எப்போதும் செயல்படுவோம்” என்றும் அவர் வலியுறுத்தியுள்ளார்.
இங்கிலாந்தைத் தொடர்ந்து France தனது விமானம் தாங்கிக் கப்பலான ‘Charles de Gaulle’-ஐயும், வான் பாதுகாப்பு ஏவுகணைகள் பொருத்தப்பட்ட மற்றொரு கப்பலையும் அனுப்ப முடிவு செய்துள்ளது. அதேபோல் Greece நான்கு F-16 போர் விமானங்கள் மற்றும் ட்ரோன் எதிர்ப்பு திறன் கொண்ட இரண்டு போர்க்கப்பல்களை சைப்பிரஸின் பாதுகாப்பிற்காக வழங்க முன்வந்துள்ளது.
மேலும், கடந்த 24 மணி நேரத்தில் ஈராக், ஜோர்டான் மற்றும் கத்தார் ஆகிய நாடுகளில் பல ட்ரோன்களை இங்கிலாந்து படைகள் சுட்டு வீழ்த்தியுள்ளதாக பாதுகாப்பு அமைச்சகம் தெரிவித்துள்ளது.
