வடக்கு லண்டனின் பிரெண்ட் பகுதியில் உள்ள கிங்ஸ்பரி உயர்நிலைப் பள்ளியில் நடந்த குத்துதல் சம்பவம் பெரும் அதிர்ச்சியை ஏற்படுத்தியுள்ளது. இந்த சம்பவத்தில் 12 மற்றும் 13 வயதுடைய இரண்டு மாணவர்கள் தீவிர காயங்களுடன் மருத்துவமனையில் அனுமதிக்கப்பட்டுள்ளனர்.
இந்த சம்பவம் செவ்வாய்க்கிழமை பள்ளி வளாகத்தில் இடம்பெற்றது. சம்பவத்திற்குப் பிறகு அவசர எச்சரிக்கை எழுப்பப்பட்டதால், மாணவர்கள் உடனடியாக பள்ளிக்குள் பாதுகாப்பு நடவடிக்கையாக பூட்டப்பட்டனர். பின்னர் நிலைமை கட்டுப்பாட்டுக்குள் வந்ததும் மாணவர்கள் விடுவிக்கப்பட்டனர்.
இந்த தாக்குதல் தொடர்பாக 13 வயதுடைய மாணவன் ஒருவரை போலீசார் கைது செய்துள்ளனர். அவர் மீது கொலை முயற்சி குற்றச்சாட்டில் விசாரணை நடைபெற்று வருகிறது. சம்பவத்திற்குப் பிறகு அவர் தப்பிச் சென்றதாக கூறப்பட்டாலும், போலீசார் விரைவான நடவடிக்கையால் அவரை கைது செய்ததுடன், தாக்குதலில் பயன்படுத்தப்பட்டதாக சந்தேகிக்கப்படும் ஆயுதத்தையும் மீட்டுள்ளனர்.
வடமேற்கு லண்டன் காவல் துறையை வழிநடத்தும் அதிகாரி லூக் வில்லியம்ஸ் கூறுகையில், காயமடைந்த மாணவர்களின் உடல்நிலை தீவிரமாக இருப்பதாகத் தெரிவித்தார். அவர்களுக்கு சிகிச்சை அளித்து வரும் மருத்துவ பணியாளர்களுக்கு நன்றி தெரிவித்ததுடன், பாதிக்கப்பட்ட குடும்பங்களுக்கு காவல் துறையின் ஆதரவு இருப்பதாகவும் கூறினார்.
சம்பவத்தின் போது தீ அலாரம் ஒலித்ததால், மாணவர்கள் அனைவரும் பைகளை விட்டுவிட்டு விளையாட்டு மைதானத்தில் திரண்டதாக ஒரு பெற்றோர் தெரிவித்தார். பல மாணவர்கள் பயத்தால் அழுததாகவும் அவர் கூறினார். இந்த சம்பவத்தால் பள்ளி பாதுகாப்பு குறித்து பெற்றோர்கள் கவலை வெளியிட்டுள்ளனர்.
கல்வி செயலாளர் பிரிட்ஜெட் பிலிப்ப்சன் இந்த சம்பவம் மிகவும் மனவேதனை அளிப்பதாக கூறியதுடன், பாதிக்கப்பட்ட குடும்பங்களுக்கும் பள்ளி சமூகத்திற்கும் ஆதரவு வழங்க அரசு தொடர்பில் இருப்பதாக தெரிவித்துள்ளார். உள்துறை செயலாளர் ஷபானா மக்மூத் இந்த தாக்குதலை அதிர்ச்சியூட்டும் சம்பவமாக விவரித்துள்ளார். தற்போது பயங்கரவாத எதிர்ப்பு பிரிவு போலீசார் விசாரணையை முன்னெடுத்து வருகின்றனர்.
