ஐபிஎல் 2026 சீசனை முன்னிட்டு ஐக்கிய அரபு அமீரகத்தின் அபுதாபியில் நடைபெற்று வரும் மினி ஏலம் ரசிகர்களிடையே பெரும் எதிர்பார்ப்பை ஏற்படுத்தியுள்ளது. இந்த ஏலத்தில், ஐந்து முறை சாம்பியன் பட்டம் வென்றுள்ள Mumbai Indians அணி, மிகக் குறைந்த கையிருப்பு தொகையுடன் களமிறங்கினாலும், தங்களது அனுபவம் மற்றும் திட்டமிடலால் கவனம் ஈர்த்துள்ளது.
மும்பை இந்தியன்ஸ் அணியிடம் இந்த மினி ஏலத்தில் ரூ.2.75 கோடி மட்டுமே இருந்த நிலையில், அதனைச் சரியாக பயன்படுத்தி முன்னாள் நட்சத்திர விக்கெட் கீப்பர் பேட்ஸ்மேனான குயின்டன் டி காக்கை வெறும் ரூ.1 கோடிக்கு வாங்கி அனைவரையும் ஆச்சரியப்படுத்தியது. இவர், இளம் வீரர் ரியான் ரிக்கல்டனுக்கு மாற்றாக மட்டுமல்லாமல், அணியின் தொடக்க பேட்டிங் வரிசைக்கு கூடுதல் பலமாக இருப்பார் என எதிர்பார்க்கப்படுகிறது.
ஏலத்திற்கு முன்பே மும்பை நிர்வாகம் தனது முக்கிய வீரர்களை தக்கவைத்திருந்தது. கேப்டன் ஹர்திக் பாண்டியா தலைமையில், ரோஹித் சர்மா, ஜஸ்பிரித் பும்ரா, சூர்யகுமார் யாதவ் போன்ற அனுபவம் வாய்ந்த நட்சத்திரங்கள் அணியின் முதுகெலும்பாக உள்ளனர். இதனுடன், டிரேட் முறையில் ஷர்துல் தாக்கூர், ஷெர்பேன் ரூதர்ஃபோர்ட் மற்றும் மயங்க் மார்கண்டே ஆகியோரை இணைத்து அணியின் ஆழத்தையும் மும்பை அதிகரித்துள்ளது.
மேலும் திலக் வர்மா, டிரென்ட் போல்ட், வில் ஜாக்ஸ், தீபக் சஹார், மிட்செல் சாண்ட்னர் போன்ற வீரர்களுடன், நமன் திர், ரியான் ரிக்கல்டன், ராபின் மின்ஸ், கார்பின் போஷ் உள்ளிட்ட இளம் முகங்களும் அணியில் இடம்பிடித்துள்ளனர். இதேவேளை, முஜீப் உர் ரஹ்மான், ரீஸ் டாப்லி, கரண் சர்மா உள்ளிட்ட சில முக்கிய வீரர்கள் அணியிலிருந்து விடுவிக்கப்பட்டுள்ளனர். அர்ஜுன் டெண்டுல்கர் லக்னோ அணிக்கு டிரேட் செய்யப்பட்டதும் குறிப்பிடத்தக்கது.
மிகக் குறைந்த பட்ஜெட்டில் செயல்பட்டாலும், அனுபவம், சமநிலை மற்றும் ஆழம் கொண்ட அணியை அமைத்துள்ள மும்பை இந்தியன்ஸ், 2026 சீசனில் மீண்டும் கோப்பையை கைப்பற்றும் முனைப்புடன் பயணிக்கிறது. ரோஹித், சூர்யா, பாண்டியா, பும்ரா போன்ற மூத்த வீரர்களின் வழிநடத்தலில், இந்த சீசனில் மும்பை ரசிகர்களுக்கு மகிழ்ச்சியான தருணங்கள் காத்திருக்கின்றன.
