பிரித்தானியாவின் குளோஸ்டர்ஷயர் பகுதியில் அமைந்துள்ள அமெரிக்க விமானப்படை பயன்படுத்தும் ஆர்.ஏ.எப் பெயர்போர்ட் விமானப்படை தளத்திற்கு அருகாமையில் பாரிய அசம்பாவிதம் ஒன்று பிரகடனப்படுத்தப்பட்டுள்ளதுடன், வெடிபொருட்கள் சட்டத்தின் கீழ் சந்தேகத்தின் பேரில் பலர் கைது செய்யப்பட்டுள்ளனர்.
இதனைத் தொடர்ந்து குறித்த விமானப்படை தளத்திற்கு அருகிலுள்ள வெல்போர்ட் கிராமத்தில் வசிக்கும் மக்கள் அவசரமாக வெளியேற்றப்பட்டு பாதுகாப்பான இடங்களுக்கு மாற்றப்பட்டுள்ளனர்.
ஞாயிற்றுக்கிழமை அதிகாலை வேளையில் வெடிபொருட்கள் சட்டத்தின் கீழ் சந்தேகநபர்கள் சிலர் கைது செய்யப்பட்டதைத் தொடர்ந்து இந்த நடவடிக்கை முன்னெடுக்கப்பட்டதாக குளோஸ்டர்ஷயர் பொலிஸார் உறுதிப்படுத்தியுள்ளனர்.
அப்பகுதியில் உள்ள குடியிருப்பாளர்கள் வெளியேற்றப்பட்டு அருகிலுள்ள பொழுதுபோக்கு மையத்திற்கு அழைத்துச் செல்லப்பட்டுள்ளனர். நிலைமையை கட்டுக்குள் கொண்டுவருவதற்காக பிரதான வீதிகள் மூடப்பட்டு பாதுகாப்பு வலயம் அமைக்கப்பட்டுள்ளது.
பிரித்தானிய இராணுவத்தின் விசேட வெடிபொருள் செயலிழக்கச் செய்யும் பிரிவினர் சம்பவ இடத்திற்கு அழைக்கப்பட்டு அங்குள்ள பல வாகனங்களை தீவிர சோதனைக்கு உட்படுத்தி வருகின்றனர்.
அத்துடன் அபாயகரமான பகுதி பதிலளிப்பு குழுவினர், ஆயுதம் தாங்கிய பொலிஸார், அவசர அம்பியூலன்ஸ் சேவைகள் மற்றும் தீயணைப்பு படையினர் உள்ளிட்ட பாரிய அளவிலான அவசர சேவை பிரிவினர் பாதுகாப்பு பணிகளில் ஈடுபடுத்தப்பட்டுள்ளனர்.
சம்பவம் தொடர்பில் அறிக்கை வெளியிட்டுள்ள குளோஸ்டர்ஷயர் பொலிஸார், நிலைமை கட்டுப்பாட்டிற்குள் கொண்டுவரப்பட்டுள்ளதாக நம்புவதாகவும், தொடர்புடைய பாதுகாப்பு நிறுவனங்களுடன் இணைந்து முன்கூட்டியே திட்டமிடப்பட்ட பாதுகாப்பு நடைமுறைகள் தீவிரமாக அமுல்படுத்தப்பட்டு வருவதாகவும் தெரிவித்துள்ளனர்.
அமெரிக்க விமானப்படையின் குண்டுவீச்சு விமானங்கள் நிலைகொண்டுள்ள இந்த முக்கிய தளம் அமைந்துள்ள பகுதியில் ஏற்பட்டுள்ள இந்த பாதுகாப்பு அச்சுறுத்தல் குறித்து பயங்கரவாத எதிர்ப்பு பிரிவினரால் விரிவான விசாரணைகள் ஆரம்பிக்கப்பட்டுள்ளன.
