2026-ஆம் ஆண்டு தமிழக சட்டமன்றத் தேர்தலை முன்னிட்டு அரசியல் கட்சிகள் தீவிரமாக தயாராகி வரும் நிலையில், நடிகர் விஜய் தலைமையிலான தமிழக வெற்றிக் கழகம் (தவெக) தனது தேர்தல் பணிகளை அதிகாரப்பூர்வமாக தொடங்கியுள்ளது. ஏற்கனவே திமுக மற்றும் அதிமுக ஆகிய கட்சிகள் தேர்தல் அறிக்கை தயாரிப்பில் ஈடுபட்டு வரும் சூழலில், தவெகவும் அதற்கான முன்னேற்பாடுகளை வேகப்படுத்தியுள்ளது.
இதன் ஒரு பகுதியாக, தவெக சார்பில் அமைக்கப்பட்டுள்ள 12 பேர் கொண்ட தேர்தல் அறிக்கைக் குழுவின் முதல் ஆலோசனைக் கூட்டம், இன்று (ஜனவரி 20) காலை 10.30 மணிக்கு சென்னையில் உள்ள கட்சியின் தலைமைச் செயலகத்தில் நடைபெறுகிறது. இக்கூட்டத்திற்கு கட்சியின் கொள்கை பரப்புச் செயலாளர் கே.ஜி. அருண்ராஜ் மற்றும் துணைப் பொதுச்செயலாளர் ஏ. ராஜ்மோகன் ஆகியோர் தலைமை வகிக்கின்றனர்.
மாநிலத்தின் ஒட்டுமொத்த வளர்ச்சி, மக்களின் அடிப்படைத் தேவைகள், சமூக நலன் உள்ளிட்ட அம்சங்களை மையமாகக் கொண்டு தேர்தல் வாக்குறுதிகளை உருவாக்குவது குறித்து இக்கூட்டத்தில் விரிவான ஆலோசனைகள் நடைபெறவுள்ளன. மேலும், பொதுமக்கள், சமூக அமைப்புகள் மற்றும் பல்வேறு தரப்பினரிடமிருந்து கருத்துகளை சேகரிக்கும் முறை, தரவுகள் அடிப்படையிலான அணுகுமுறை போன்றவை குறித்தும் முக்கிய முடிவுகள் எடுக்கப்பட உள்ளதாக தகவல்கள் தெரிவிக்கின்றன.
இதன் மூலம், தவெக வெளியிடவுள்ள முதல் தேர்தல் அறிக்கை எப்படி அமையும் என்ற எதிர்பார்ப்பு அரசியல் வட்டாரத்தில் அதிகரித்துள்ளது.
