2026 ஐபிஎல் மினி ஏலத்தை முன்னிட்டு, அபுதாபியில் நேற்று நடந்த மாதிரி ஏலத்தில் ஆஸ்திரேலிய ஆல்-ரவுண்டர் கேமரூன் கிரீன் ரூ.30.50 கோடிக்கு விலை போய் அனைவரையும் அதிர்ச்சியில் ஆழ்த்தினார். ஸ்டார் ஸ்போர்ட்ஸ் நடத்திய இந்த நிகழ்வில் முன்னாள் கிரிக்கெட் வீரர்கள் 10 அணிகளின் பிரதிநிதிகளாக பங்கேற்றனர். சுரேஷ் ரெய்னா (சிஎஸ்கே), ராபின் உத்தப்பா (கேகேஆர்), அனில் கும்ப்ளே (ஆர்சிபி) ஆகியோர் தங்கள் அணிகளுக்காக ஏலத்தில் கலந்துகொண்டனர்.
மிகப்பெரிய ஹைலைட் கேமரூன் கிரீன் ஆவார். அதிக கையிருப்புத் தொகையை வைத்திருந்த கொல்கத்தா நைட் ரைடர்ஸ் அணி அவரை வாங்க கடும் போட்டி போட்டது. இறுதியில் ராபின் உத்தப்பா கேமரூன் கிரீனை ரூ.30.50 கோடிக்கு வாங்கினார். இது உண்மையான ஏலத்தில் ரிஷப் பண்ட் ரூ.27 கோடிக்கு விலை போன சாதனையை முறியடிக்கும் வலிமை காட்டியது.
சிஎஸ்கே அணிக்கு சுரேஷ் ரெய்னா சில திறமையான தேர்வுகளைச் செய்தார். இந்திய சுழற்பந்து வீச்சாளர் ராகுல் சஹாரை ரூ.10 கோடிக்கு, தென்னாப்பிரிக்க வேகப்பந்து வீச்சாளர் ஆன்ரிச் நோர்ட்ஜேவை ரூ.7.5 கோடிக்கு வாங்கினார். அதிரடி வீரர் சர்ஃபராஸ் கான் மற்றும் இலங்கை ஸ்பின்னர் வனிந்து ஹசரங்காவை சேர்த்து வெறும் 9 கோடிக்குள் வாங்கியுள்ளார். முன்னாள் வீரர் டெவோன் கான்வே மாதிரி ஏலத்தில் விலை போகவில்லை.
முந்தைய மெகா ஏலத்தில் அதிக விலை பெற்ற வெங்கடேஷ் ஐயர் இந்த மாதிரி ஏலத்தில் சராசரி விலைக்கு வாங்கப்பட்டார். ராயல் சேலஞ்சர்ஸ் பெங்களூரு அவரை வெறும் 6 கோடிக்கு வாங்கியது, இது அவருக்கு 17.75 கோடி நஷ்டமாகும்.
மாதிரி ஏலத்தில் டாப் 5 அதிக விலை பெற்ற வீரர்கள்: கேமரூன் கிரீன் (30.50 கோடி, KKR), லியம் லிவிங்ஸ்டோன் (19 கோடி, LSG), மதீஷா பதிரானா (13 கோடி, KKR), ரவி பிஷ்னாய் (11.50 கோடி, RR), ராகுல் சஹார் (10 கோடி, CSK). டெல்லி கேப்பிட்டல்ஸ் அணி டேவிட் மில்லரை ரூ.9.5 கோடிக்கு, பிரித்வி ஷாவை ரூ.2.75 கோடிக்கு வாங்கியது.
மாதிரி ஏலத்தில் ஏற்பட்ட இந்த பரபரப்பான சூழல், இன்று நடைபெறவிருக்கும் உண்மையான ஐபிஎல் ஏலத்தில் என்ன நடக்கும் என்பதற்கான எதிர்பார்ப்பை அதிகரித்துள்ளது.
