2027 சனிப் பெயர்ச்சியால் ஏழரை சனியிலிருந்து விடுபடும் ராசி எது தெரியுமா? சிக்கும் புதிய ராசிக்கு பரிகாரங்கள் இதோ!

நவகிரகங்களில் நீதிமானாகவும் கர்ம பலன்களை அள்ளித்தரும் கிரகமாகவும் போற்றப்படும் சனி பகவான், ஒருவரின் பாவ புண்ணியங்களுக்கு ஏற்ப பலன்களை வழங்கக்கூடியவர். மந்த கதியில் இயங்கும் சனி பகவான் ஒரு ராசியில் சுமார் இரண்டரை ஆண்டுகள் தங்கி தனது ஆட்சியை செலுத்துகிறார்.

ஜோதிட சாஸ்திரத்தில் ஏழரை சனி காலம் என்பது ஒவ்வொரு மனிதனின் வாழ்க்கையிலும் மிக முக்கியமான திருப்புமுனையாகவும் சவாலான காலமாகவும் கருதப்படுகிறது. இக்காலகட்டத்தில் உடல் ஆரோக்கியம், தொழில் உத்தியோகம் மற்றும் குடும்ப உறவுகளில் சோதனைகள் ஏற்பட்டாலும், நேர்மையான உழைப்பிற்கு ஏற்ப சனி பகவான் பிற்காலத்தில் சிறப்பான பலன்களையும் வாரி வழங்குவார்.

தற்போது குரு பகவானின் ஆதிக்கமுடைய மீன ராசியில் சஞ்சரித்து வரும் சனி பகவானால், கும்பம், மீனம் மற்றும் மேஷ ராசிகளுக்கு ஏழரை சனி ஆதிக்கம் நடைபெற்று வருகிறது.

இந்த நிலையில் வரும் 2027 ஆம் ஆண்டு ஜூன் மாதம் 03 ஆம் திகதி சனி பகவான் மீன ராசியிலிருந்து விடைபெற்று செவ்வாயின் மேஷ ராசிக்குள் பிரவேசிக்கவுள்ளார். இந்த மகா பெயர்ச்சியின் காரணமாக ஒரு குறிப்பிட்ட ராசி நீண்ட கால ஏழரை சனியின் பிடியிலிருந்து முழுமையாக விடுதலை பெறவுள்ளதுடன், மற்றொரு ராசிக்கு ஏழரை சனியின் ஆரம்பக் கட்டம் தொடங்கவுள்ளது.

ஜோதிட கணிப்புகளின்படி, 2027 ஜூன் 03 சனிப் பெயர்ச்சியோடு பல வருடங்களாக ஏழரை சனியின் பிடியில் சிக்கி தவித்து வந்த கும்ப ராசிக்காரர்கள் அதிலிருந்து முழுமையான விமோசனம் பெறுகின்றனர். இதனால் கும்ப ராசியினருக்கு இருந்த பொருளாதார மந்தநிலை, மன அழுத்தம் மற்றும் தொழில் தடைகள் நீங்கி புதுவாழ்வு பிறக்கும்.

அதே சமயம், ரிஷப ராசிக்காரர்களுக்கு ஏழரை சனியின் முதல் சுற்றான விரய சனி ஆரம்பமாகின்றது. ஜென்ம ராசிக்கு 12 ஆம் வீட்டில் சனி பகவான் அமர்வதால் இந்த விரயச் சனியின் காலகட்டம் தொடங்குகிறது.

ரிஷப ராசியினருக்கு இந்த காலகட்டத்தில் நிதி நிலைமை மற்றும் மன அமைதியில் பெரும் மாற்றங்கள் உண்டாகலாம். செய்யும் காரியங்களை பலமுறை அலைந்து திரிந்து முடிக்க வேண்டிய சூழல் ஏற்படுவதுடன், பணியிடத்தில் கூடுதல் பணிச்சுமை காரணமாக மன உளைச்சல் ஏற்பட வாய்ப்புள்ளது.

தேவையற்ற மருத்துவ செலவுகள், தூக்கமின்மை, திடீர் இடமாற்றம் மற்றும் குடும்பத்தினரிடையே கருத்து வேறுபாடுகள் தலைதூக்கக்கூடும் என்பதால் நிதானமும் பொறுமையும் மிக அவசியமாகும்.

இந்த ஏழரை சனியின் தோஷ வீரியத்தை குறைத்து நற்பலன்களைப் பெற சில வழிபாட்டு முறைகள் பெரிதும் துணைபுரியும். சனிக்கிழமைகளில் விரதமிருந்து சனி பகவானை வழிபடுவதுடன், கருப்பு எள் கலந்த நல்லெண்ணெய் தீபம் ஏற்றி வழிபடலாம்.

ஆதரவற்றோருக்கு கருப்பு நிற வஸ்திரம் அல்லது கருப்பு உளுந்து தானம் செய்வது சிறந்த பரிகாரமாகும். மேலும் சனிக்கிழமைகளில் அரச மரத்தை வலம் வந்து வழிபடுவதும், வீர அனுமனை மனமுருகி துதிப்பதும் சனியின் எதிர்மறை தாக்கங்களை பெருமளவு குறைத்து சுப பலன்களை அதிகரிக்கச் செய்யும்.